பிரபல எழுத்தாளருக்கு பகிரங்கக் கடிதம்

பெருமதிப்பிற்குரிய பிரபல எழுத்தாளர் ஜான் சீனா அவர்களுக்கு,

உங்களுடைய பரம வெறியன் தூக்கநாயக்கன்பாளையம் துரைசாமி எழுதும் கடிதம். பல ஆண்டுகளாக உங்களுடைய எழுத்தை தொடர்ந்து வாசித்தாலும் இதுதான் நான் உங்களுக்கு எழுதும் முதல் வாசகர் கடிதம்..அப்போதாவது இதை நிச்சயம் நீங்கள் உங்களுடைய வலைப்பூவில் வாரந்தோறும் வருகிற மண்ணுசைவம் பதிவில் போட்டு என்னை பிரபலமாக்குவீர்கள் என்ற நம்பிக்கையில் இந்த கடிதத்தை என் ரத்தத்தால் எழுதியுள்ளேன். பி பாஸிட்டிவ் குரூப்.

என்னுடைய மூன்று வயது பையன் உங்களை விடவும் அருமையாக எழுதுகிறான்.ஆனாலும் நான் ஏன் உங்கள் எழுத்தை வாசிக்கிறேன். இப்படி ஒரு கேள்வி பல ஆண்டுகளாக தொடர்ந்து எழுந்தாலும் அதற்கான காரணம் இப்போதுதான் புரிந்தது. நீங்கள் ஒரு மகான்.காந்தி,நேரு,நேதாஜி,விஜயகாந்த்,அர்ஜுன் இவர்களுக்கு பிறகு நம் நாட்டின் மீது அதிக பற்றுக்கொண்ட தேசபக்தி எழுத்து உங்களுடையது. சோராமசாமி,டிராபிக்ராமசாமி,விகேராமசாமிக்கு பிறகு நம் மக்களின் மீது பற்றிகொண்ட எழுத்து உங்களுடையது. நயன்தாரா,ஷகிலா,சிந்து,மரியா,பரவை முனியம்மா மாதிரி கவர்ச்சி கொட்டிய டபுள் எக்ஸ் எழுத்து உங்களுடையது. அதுதான் காரணம்.

உங்கள் வலைப்பூவினை வாசிப்பதற்கு முன்னால் எனக்கு வேலை கிடையாது. சாப்பாட்டுக்கே வழியில்லை.உங்கள் வலைப்பூவில் கி.பி.2009ல் டிசம்பர் மாதம் வெளியான ஒரு பதிவில் நீங்கள் வேலை வெட்டியில்லாமல் மோட்டு வளையை பார்த்தபடி பல ஆண்டுகள் ஓசியிலேயே உடம்பு வளர்த்ததைப் பற்றி விரிவாக எழுதியிருந்தீர்கள். அதைப்படித்து உடம்பு சிலிர்த்து நானும் உங்களைப்போல் கடந்த இரண்டு ஆண்டுகளாக வீட்டில் வெட்டியாகத்தான் இருக்கிறேன். ஆனால் உங்களைப்போலவே ஓசி சோத்துக்கு வழி பண்ணிவிட்டேன். காரணம் நீங்கள் நீங்கள் மட்டும்தான். உங்களால்தான் என் வாழ்க்கையில் மாற்றம் உண்டானது.

நாம் ஏற்கனவே சந்தித்திருக்கிறோம். உங்களுக்கு நினைவிருக்காது. தினமும் மெரீனா பீச்சிலும்,ஸ்பென்சர் பிளாசாவிலும்,கோவிலிலும்,சர்ச்சிலும்,மசூதியிலும் பல நூறு வாசகர்களை சந்திக்கும் உங்களுக்கு என்னை நினைவிருக்காது. நான் ஒரு முறை வில்லிவாக்கம் டாஸ்மாக்கில் உங்களிடம் ஓசி ஊறுகாய் கேட்டிருக்கிறேன். அதைப்பற்றி நீங்கள் கி.பி.2008 மார்ச் ஆறாம்நாள் எழுதிய ஓசி ஊறுகாயும் ஒரு குவாட்டர் கட்டிங்கும் என்கிற பதிவில் நான் ஓசியில் வாங்கிய ஊறுகாய் பாக்கட் குறித்து எழுதியிருந்தாலும் அதை வாங்கிய என்னைப்பற்றி ஒரு வரி கூட எழுதவில்லையே.

நீங்கள் எழுதியிருந்த பக்கத்தூட்டு ஆயா இடியாப்பத்துக்கு பாயா சிறுகதையை படித்து அழுதுவிட்டேன்.அதிலும் அந்த பாயா அந்த ஆயாவிற்கு கிளைமாக்ஸில் கிடைக்காமல் போவது மிகமிக டச்சிங்! நான் சுஜாதாவிடம் பார்த்த அந்த துள்ளலும் எள்ளலும் நக்கலும் உணர்ச்சியும் உங்களிடம் மட்டும்தான் இருக்கிறது. டேய்.. நீ எழுத்தாளன்டா.. சாரி என்னை மன்னித்துவிடுங்கள் ஒரு எமோசனில் டா போட்டுவிட்டேன். அந்த கதையை ஏன் இப்படி முடித்தீர்கள். பாவம் அந்த ஆயா. உங்களை சரிதான் போயா என்று உரிமையோடு திட்ட வேண்டும் போல இருந்தாலும்,உங்களுடைய எழுத்தில் சப்பணமிட்டு அமர்ந்திக்கும் ஷகிலாவும் ஜோதிகாவும் என்னை தடுத்து நிறுத்திவிட்டனர். டேய் நீ உலகமகா எழுத்தாளன்டா!டே..

நீங்கள் ஏன் நாவல் எழுதக்கூடாது. உங்களுக்கு அதற்கான சகல தகுதிகளும் இருக்கிறது. தயவுசெய்து நீங்கள் அடுத்த ஆறுமாதத்திற்குள் நாவல் எழுதாவிட்டால் வீடு தேடிவந்து உங்களை நடுரோட்டில் போட்டு நாயடிப்பதை போல அடித்துவிடுவேன் என்பதையும் சொல்லிக்கொள்கிறேன். தயவு செய்து எழுதுங்கள்.ஏன் கடந்த சில நாட்களாக எதுவுமே எழுதுவதில்லை. உங்கள் வலைப்பூவை ஒவ்வொரு மைக்ரோ விநாடிக்கும் ஒரு முறை ரிப்ரஷ் செய்து செய்து என்னுடைய விரல் இரண்டு சென்டிமீட்டர் தேய்ந்துவிட்டது.

ஆனாலும் உங்களுக்கு மட்டும் எப்படி ஒரு நாளைக்கு பத்தாயிரம் ஹிட்ஸ் கிடைக்கிறது. மற்றபடி உங்கள் எழுத்தை நேசிக்கும் நூறு கோடி தமிழர்களுக்காகவும் ஐநூறு கோடி இந்தியர்களுக்காகவும் பல கோடி மனிதர்களுக்காகவும் தயவு பண்ணி எழுதுங்க. அதேபோல எப்படி வலைப்பூ ஒன்றை ஆரம்பிப்பது என்று சொல்லிக்கொடுத்தால் உங்களைப்போலவே நானும் மிகப்பெரிய எழுத்தாளன் ஆவேன்.

நீங்கள் கொடுத்த முப்பது ரூபாவுக்கு இவ்வளவுதான் முடியும். தொகையை அதிகமாக்கினால் இன்னும் நிறைய கூவுவேன் என்று உறுதியளிக்கிறேன்.

நன்றி

துரைசாமி